Клиникалық мамандықтар бойынша ЖОО талапкерлері арнайы емтихан тапсырады

Келесі жылдан бастап елімізде медицина саласындағы клиникалық мамандықтар бойынша жоғары оқу орнына түскісі келетін азаматтар ҰБТ-дан бөлек арнайы емтихан тапсыратын болады. Бұл жөнінде бүгінгі брифинг барысында ҚР ДСМ Ғылым және адами ресурстар департаментінің директоры Айгүл Қаптағаева мәлімдеді, деп хабарлайды Baq.kz тілшісі.

    «Расында да, қабылдау комиссиясы сертификаттың түпнұсқалығын тексеруін және оны растауын міндеттейтін норма жоқ. Сол себепті біз Денсаулық сақтау министрлігі ретінде Білім және ғылым министрлігіне мұндай құжаттардың шынайылығын растауды қарастыратын өзгерісті әрекет етуші нормаларға енгізу туралы ұсыныс жасадық. Сонымен қатар, естеріңізде болса, бұрындары жоғарғы оқу орнына түсу үшін емтихан тапсырудан бөлек талапкерлермен сұхбаттасу жүргізілетін. Оның нәтижесінде талапкердің болашақ мамандығына кәсіби қабілеттілігі анықталатын. Қазір Мәжілісте қаралып жатқан Білім туралы заңға оқуға түсу кезінде арнайы емтихан тапсыруын міндеттейтін өзгеріс енгізілуін талап етіп жатырмыз. Арнайы емтихан клиникалық мамандықтар бойынша оқуға түсетіндер үшін қарастырылады. Ол психологиялық тестілеу түрінде болуы мүмкін. Қазір түрі нақтылануда. Бұл емтихан келесі жылдан бастап енгізіледі. Заңға өзгертулер мақұлданғаннан кейін біз осы жылдың ішінде бүкіл нормативтік базаны әзірлейтін боламыз. Сондай-ақ, психологиялық тестілеуді әзірлеуге лицензиялары бар ұйымдармен жұмыстар жүргізіп, пилоттық режимде сынақтан өткіземіз», - деді Қаптағаева.

 Сонымен қатар, департамент директоры оқудан шығарылған университет білім алушыларының дипломдарына тексеру жүргізуге еш негіз жоқ екенін айтты.

    «Егер, бұл жұмыс жасап жүрген дәрігерлер болса, онда олардың мемлекеттік үлгіде берілген дипломдары бар. Сондықтан, мемлекеттік үлгідегі бұл құжаттарды тексеру бойынша қандай да бір шаралар қабылданады деп ойламаймын. Өкінішке қарай, бұл оқиға материалдық шығын, үлкен моральдық шығын келтіріп қоймай, мамандық беделіне де үлкен нұқсан келтіріп отыр. Мемлекетке ұзақ уақыт өндірілетін материалдық шығын келтірумен қатар, денсаулық сақтау саласы сенім артқан мамандарынан да айырылып отыр. Сол себепті, алдағы уақытта мұндай жағдайлар қайталанбасы үшін құжаттар қайта тексерілетін болады», - деді ДСМ өкілі.

Бұқараға сертификат дауына қатысты орын алған жағдайды түсіндіру мақсатында ұйымдастырылған брифингке Жоғарғы оқу орнынан кейінгі білім беру деканы Ернар Тұрсынбет те қатысып, маман Астана медицина университеті лицензиядан айырылуы мүмкін екенін де жасырмады.

    «Жүргізілген екі тексеруден кейін Білім және ғылыми министрлігінің бақылау комитеті тарапынан нұсқама беріліп, әкімшілік құқық бұзушылық туралы хаттама толтырылған болатын. Онда университет лицензиясына қатысты сұрақ бар. Егер, біз өзімізге жүктелген нұсқаманы толықтай орындамасақ, онда министрлік тарапынан лицензия қайтарылып алынуы мүмкін», - дегенді айтты Ернар Тұрсынбет.

Естеріңізге салайық, былтыр күзде емтиханды өз күшімен тапсырғандар арызданып, бұл іс бойынша тексеріс жүргізілген еді. Соның нәтижесінде ағылшын тілі емтиханы бойынша 117 тіркелмеген сертификат анықталды. Магистратура немесе докторантураға түсемін дегендерге IELTS сертификаты емтихан кезінде басымдық береді. Сол себепті болар, былтыр көп адам бұл құжатты сатып алып, жарасын жеңілдеткісі келді. Алайда барлық сынақтан өз күшімен өткендер қалыптасқан жағдаймен келіспеді. Студенттер бұл мәселеге қоғам назарын барынша аударуға тырысты. Нәтижесінде Білім және ғылым министрлігі тексеріс жүргізіп, базада тіркелмеген 117 сертификат бар екендігін анықтады.

Сондай-ақ, бүгінгі брифинг барысында медициналық университет ректоры жасанды IELTS сертификаттарын ұсынуына байланысты оқудан шығарылған білім алушылар ЖОО-ға қайта құжат тапсыра алатынын, алайда, олар тек ақылы негізде ғана оқи алатынын мәлімдеген болатын. Сонымен қатар, сертифкат дауына байланысты оқудан шығарылған 117 білім алушының 82-сі резидентурада, 24-і магистратурада және 11-і докторантурада оқыған.

baq.kz

You have no rights to post comments