Жыл соңына дейін 6 жасқа толғандар мектепке қабылданады – БҒМ

Білім және ғылым министрлігі Қазақстанда балаларды бірінші сыныпқа қабылдауға енгізілген жаңа ережелерді жариялады, деп хабарлайды Вaq.kz ақпарат агенттігі ҚР БҒМ баспасөз қызметіне сілтеме жасап.

Ведомствоның хабарлауынша, биыл қыркүйек-желтоқсан айларында 6 жасқа толған балалар 1-сыныпқа қабылданады. Себебі, олар жыл соңына дейін толық 6 жасқа – яғни мектепке қабылдау жасына жетеді.

«Бастауыш, негізгі орта және жалпы орта білім беру ұйымдарына оқуға қабылдаудың үлгі қағидаларына сәйкес, жалпы білім беретін оқу бағдарламасын іске асыратын білім беру ұйымдары дайындық деңгейіне қарамастан, білім беру ұйымдарының қызмет көрсету аумағында тұратын балалардың қолжетімділігін қамтамасыз етіп, жеті жасқа толған және ағымдағы жылы алты жасқа толатын балалардың бірінші сыныпқа қабылдануын қамтамасыз етеді. Яғни, қыркүйек-желтоқсан айларында туған балалар ағымдағы жылдан бастап 1-сыныпқа бара алады. Өйткені, балалар күнтізбелік жылдың соңына дейін алты жасқа толып, мектепке қабылдану құқығына ие болады», - делінген хабарламада.

Сонымен қатар, ата-аналар балаларын қай мектепке бергісі келсе, сол мектепті таңдау құқығы бар. Егер мектеп басшылығы баланы қабылдаудан бас тартса, жергілікті білім беру органдарына шағымдануға болады.

«Білім алушының ата-аналары немесе өзге де заңды өкілдері білім алу үшін кез келген білім беру ұйымын таңдауға құқығы бар екенін айта кеткен жөн. Білім беру ұйымына қабылдаудан бас тартқан жағдайда, білім алушының ата-аналары немесе басқа заңды өкілдері тұрғылықты жері бойынша жергілікті білім басқармаларына шағымданады. Құжаттарды қабылдау 1 маусымнан 30 тамызға дейін жүзеге асырылады. Сондай-ақ, бірінші сыныпқа балаларды қабылдау үшін қажет құжаттар тізімінен мекенжай анықтамасы алып тасталған», - деп жазылған ведомство хабарламасында.

baq.kz

You have no rights to post comments