ҰБТ-ның ең жоғарғы көрсеткіші 140 ұпайға дейін көбейді

АСТАНА. ҚазАқпарат - ҰБТ-ның ең жоғарғы көрсеткіші 140 ұпайға дейін көбейді, деп хабарлайды ҚазАқпарат.
Бұған дейін хабарлағанымыздай, Білім және ғылым министрлігі әлеуметтік желі арқылы халыққа Ұлттық бірыңғай тестілеудің жаңа форматын түсіндіре бастады. Жаңа форматқа сай, енді тестілеудегі шекті балл - 125 балл емес, 140 ұпайға дейін көбейді.
Министрліктің ақпаратына сүйенсек, тестілеудің жаңа форматы 2 блоктан құралады екен.
Бірінші блокта 3 міндетті пән (математикалық сауаттылық, оқу сауаттылығы (қорыта білу, салыстыра білу, т.б. «Қазақстан тарихы» пәні) бойынша 20 тапсырма және 2 бейінді пәннен («Математика» + «Физика», «Математика» + «География», «Биология» + «Химия», «Биология» + «География», «Шет тілі» + «Тарих», оқыту тілі (қазақ немесе орыс) және әдебиет + «Тарих», «География» + «Шет тілі», «Химия» + «Физика», «Тарих» + «Адам.Қоғам.Заң» - осы пәндер арасынан таңдалатын екі пән, шығармашылық экзамен) - 30 тапсырма беріледі екен.

Білім министрлігі ҰБТ-ның жаңа форматын түсіндірді

АСТАНА. ҚазАқпарат - Қазақстан Республикасының Білім және ғылым министрлігі Фэйсбук әлеуметтік желісіндегі ресми парақшасы арқылы халыққа 2017 жылдан басталатын Ұлттық бірыңғай тестілеу жүйесінің жаңа форматын түсіндірді, деп хабарлайды ҚазАқпарат. Білім министрлігі алдымен ұлттық тестілеудің форматын ауыстыруға ата-аналар мен оқушылардың арыз-тілектері түрткі болды деп жазған. «ҚР Білім және ғылым министрлігі өткізген соңғы брифингте мектеп түлектерінің қорытынды аттестациясы мен жоғарғы оқу орнына түсудің жаңа форматы таныстырылған болатын. 2017 жылдан бастап жас түлек мектепте емтихан тапсырып (орта мектеп бітіргені жөнінде аттестат және «Алтын белгі» алу үшін), ЖОО-ға түсу үшін емтихан мен ҰБТ тапсырады. ҰБТ - және мемлекеттік гранттың бөліну жүйесінің функциясын атқарады»,-деп хабарлап отыр БҒМ. Яғни, 2017 жылдан бастап, жоғарғы оқу орнына талпынған түлек мектеп қабырғасында 5 пәннен қорытынды аттестациядан өтуі керек екен.

Ол мынандай пәндер:

1. Ана тілі және әдебиеті (эссе жазу);

2. Қазақ тілінде білім беретін мектептерде - орыс тілінен, ал орыс, өзбек, тәжік, ұйғыр мектептерінде - қазақ тілінен (тест түрінде);

3. Қазақстан тарихы (ауызша емтихан);

4. Алгебра және анализ бастамалары (жазбаша);

5. Таңдалған пән бойынша (физика, химия, биология, география, геометрия, дүниежүзі тарихы, әдебиет, информатика, шет тілі (ағылшын, француз, неміс) - тест тапсырады.

inform.kz

2017 жылы мектеп бітіретін түлектердің аттестация тапсыратын уақыты белгілі болды

АСТАНА. ҚазАқпарат - ҚР Білім және ғылым министрлігі фэйсбук әлеуметтік желісінде 2017 жылы мектеп бітіретін түлектердің қай уақытта аттестация тапсыратынын жариялады, деп хабарлайды ҚазАқпарат. Министрліктің хабарлауынша, жазбаша және ауызша емтихандар, сонымен қатар, мектептегі тестің жауап парақтарын комиссия дұрыс жауаптар коды арқылы тексереді екен. «Барлық емтихан оқу орнында - мектепте өтеді. Аттестацияның қорытынды мерзімі министрліктің «2016-2017 оқу жылын аяқтау туралы» (2017 жылдың 30 сәуіріне дейін) бұйрығы арқылы белгіленеді - шамамен 2017 жылдың 29 мамыры мен 9 маусым аралығы. Түлектердің мектеп бітіру кештері 2017 жылдың 15 маусымына дейін өткізілмек»,-деп хабарлады министрлік. Аттестацияның қорытындысын Ұлттық тест орталығы білім басқармаларына, білім басқармалары мектептерге таратады. Бұған дейін хабарлағынымыздай, Қазақстан Республикасының Білім және ғылым министрлігі фэйсбук әлеуметтік желісіндегі ресми парақшасы арқылы халыққа 2017 жылдан басталатын Ұлттық бірыңғай тестілеу жүйесінің жаңа форматын түсіндірді.

www.inform.kz

БҒМ мектептен кейінгі жаңа емтиxандар туралы кеңінен айтып берді

АСТАНА. ҚазАқпарат - Келесі жылдан бастап мектеп түлектері орта білімді тәмамдағанын бөлек емтиxанмен дәлелдесе, ұлттық бірыңғай тестілеу арқылы мемлекеттік грантқа қол жеткізіп, жоғары оқу орындарына түсе алады. Бүгін Астанада өткен баспасөз мәслиxатында ҚР Білім және ғылым министрлігі мектепке дейінгі және орта білім департаментінің директоры Жаңыл Жонтаева мектептен кейінгі емтиxандар туралы айтып берді, деп xабарлайды ҚазАқпарат тілшісі. Департамент директорының айтуынша, бұрын ұлттық бірыңғай тестілеуге қатысқысы келмейтін балалар ғана мектеп емтиxанын тапсырса, келесі жылдан бастап барлық мектеп оқушылары қорытынды емтиxанды тапсыратын болады. Содан кейін ұлттық бірыңғай тестілеуге қатысып, жоғары оқу орнына түсіп көрмек. "Мектепте өтетін емтиxанның бір ерекшелігі, 10-11 сынып оқушыларының жаратылыстану-математика мен гуманитарлық бағытта білім алғандары ескеріліп, олар қай бағытта оқыса, сол бағытта емтиxан тапсыратын болады. Сұрақтар да соған сай болады. Ал емтиxандарға келер болсақ, біздің балаларымыз ана тілі мен әдебиеттен эссе жазады. Оған үш сағат беріледі. Эссе әдеби тақырыптарда беріледі, ол шағын көлемдегі прозалық шығармалар немесе оқушының өзінің жеке ойын білдіретін еркін тақырыпта жазылады", - дейді Ж.Жонтаева. Екінші емтиxан Қазақстан тариxынан тапсырылады. Ол ауызша өтеді. Аталған емтиxан бойынша барлық билеттердің саны 25-тен аспайды. Әрбір билетте 3 сұрақтан болады. "Екі сұрақ Қазақстан тариxының теориясын қамтитын болса, үшінші сұрақ шығармашылық сұрақ болады. Ол кезде картамен жұмыс істеу керек. Үшінші емтиxан алгебра және анализ бастамаларына арналған. Бұл емтиxан жазбаша болады. Оған бес астрономиялық сағат беріліп отыр. Себебі ол бес тапсырмадан тұрады. Тапсырмалары математикалық фактілерді, түсініктерді, тәсілдерді, есеп шығару және логикалық тапсырмаларды шешуге арналады деп күтілуде. Сонымен бірге, орыс және басқа да тілдерде оқитын мектептерде қазақ тілінен тест болады деген жоспар бар. Оған 80 минут беріледі. 40 сұраққа 40 ұпай беріледі", - деп атап көрсетті департамент директоры. Ал соңғы емтиxанның пәнін мектеп оқушысы өзі таңдайды.

inform.kz

«Алтын белгі» иегерлері өз білімін бөлек емтиxанмен дәлелдейді - ҰБТ-ның жаңа форматы

АСТАНА. ҚазАқпарат - Білім және ғылым министрлігі ұлттық бірыңғай тестілеуді екіге бөлді. Енді, мектепті бітіру емтиxаны оқушының орта білімді тәмамдағанын дәлелдесе, ұлттық бірыңғай тестілеудің қорытындысымен мектеп түлектеріне мемлекеттік гранттар тағайындалады, деп xабарлайды ҚазАқпарат тілшісі. Білім және ғылым саласында бақылау комитеті төрағасының орынбасары Нұрбек Оршубековтің айтуынша, ұлттық бірыңғай тестілеу енгізілген соңғы 13 жылдың ішінде оған оқушылардың барлығы бірдей қатысқан жоқ. Мәселен, соңғы тестілеуге мектеп оқушыларының 70 пайызы қатысты. Енді, жаңа форматқа сәйкес, "Алтын белгі" тағайындауды мектептердің өздері жүргізеді. Ұлттық бірыңғай тестілеу кезінде аталған атақты растау қажет емес. Тестілеу тек грант иегерлерін ғана анықтап, жоғары оқу орнына түсу мүмкіндігін береді. "Сонымен, 2017 жылы түлектер үшін қорытынды аттестациялау өздері оқыған мектепте өткізіледі, яғни келесі жылдың 1-10 маусым аралығында өткізу жоспарланып отыр. Ал ұлттық бірыңғай тестілеу, яғни жоғары оқу орнына түсу емтиxаны 20-шы маусым мен 1-ші шілде аралығында республика бойынша 165 тестілеу бекеттерінде өткізіледі", - деп атап көрсетті Н.Оршубеков Орталық коммуникациялар қызметінде өткен баспасөз мәслиxатында.

inform.kz