2019 жылдан бастап бала 6 жасында мектепке баруға міндетті болады – БҒМ

«Білім туралы» ҚР заңының 31-бабына сәйкес 2019 жылдан бастап бала 6 жасында мектепке баруға міндетті болады. Бұл тәжірибе дамыған елдерде кеңінен қолданылуда. Сондай-ақ, 12 жылдық білім беру жүйесі «0 сынып (мектепалды даярлық)+11 сынып» принципі бойынша енгізіледі. Бұл туралы Орталық коммуникациялар қызметінде «Жаңартылған білім мазмұны мен 12 жылдық білім беруге көшу» тақырыбында өткен баспасөз мәслихатында ҚР БҒМ Мектепке дейінгі және орта білім департаменті директорының орынбасары Зейнеп Мақсұтова мәлімдеді, деп хабарлайды Baq.kz тілшісі.

Бес күндік оқу жүйесі мұғалімдердің жалақысына қалай әсер етеді?

Бес күндік оқу жүйесі мұғалімдердің жалақысын қысқартуға себеп болмайды. Білім министрлігі қайта педагогтардың жалақысын көтеру жоспарланып отырғанын мәлімдеді, деп хабарлайды Вaq.kz.

Білім беру реформалары мұғалімдердің жалақысына әсер етпейді. Биылғы жылдан бастап бірінші сынып оқушылары бес күндік оқу жүйесіне көшеді. Білім және ғылым министрлігінің мәліметінше, мектептерге 12 жылдық білім беру бағдарламасы енгізілгеннен кейін тіпті мұғалімдердің жалақысын көтеру жоспарланып отыр.

    «2019 жылдан бастап елімізде жаңа білім беру бағдарламасы іске қосылады. Айта кетейік, педагогтардың еңбекақысын қысқартпаймыз. Олардың жалақысын өсіру жоспарымызда бар, бірақ бұл әзірге жоспар ғана. Қашан екені белгісіз», - деп хабарлады informburo.kz порталына министрліктен.

12 жылдық білім беру схемасы бойынша «0 сынып (мектепалды даярлық)+11 сынып» принципі бойынша енгізіледі. Барлық сыныптарды жаңартылған мазмұнға көшіру 2020 жылға қарай аяқталады. 12 жылдық білім беру жүйесі кезең-кезеңімен енгізіледі. Яғни 2016 жылы – 1 сыныптар, 2017 жылы – 2,5,7 сыныптар, 2018 жылы – 3,6,8, 10 сыныптар, 2019 жылы – 4,9, 11 сыныптар көшіріледі.

Айта кетейік, 2016 жылдың наурызында БҒМ мектептерді бес күндікке көшіру схемасын бекітті. Қазақстан Президенті оқушыларды бес күндік оқу аптасына көшіру туралы шешімді қолдап, бірқатар пәнді біріктіруді ұсынды.

baq.kz

Білім және ғылым министрлігінің сайтында электронды оқулықтар жарияланды

АСТАНА. ҚазАқпарат - ҚР БҒМ алғаш рет өзінің сайтына оқулықтардың электрондық нұсқасын орналастыруда. Онда ең бірінші болып бірінші сыныптарға арналған мазмұны жаңартылған оқулықтар салынды.

«Енді әр оқушы, ата-ана, оқушы бұл электрондық білім беру ресурсына еркін кіре алады және оны өздеріне қолайлы кез келген уақытта пайдалана алады. Оқулықтардың электрондық нұсқасын қазақстандық баспалар берді, олар биыл барлық бірінші сынып оқушылары үшін оқулық шығарды», - делінген ҚР БҒМ баспасөз қызметінің хабарламасында.

Ведомство атап өткендей, оқу құралын интерактивті берудің заманауи әдістері білім алуды кез келген жастағы оқушы үшін қызықты да тартымды ете түседі.

«Электрондық оқулықтарды пайдалану - қазақстандық білім беру жүйесінің жаңа технологиялық бағытына сәйкес келуімен қоса, оқушылардың бағдарламаға қызығушылығын артттырады», - делінген таратылған хабарламада.

inform.kz

Мұғалімді емес, осының бәрін реттей алмай отырған механизмді жұмыстан шығарайық.

Мұғалім ақша жинамағанда қайтеді. Бүгінгі беріліп жатқан ақпараттарға сенсек, оқушылардан ақша жинаған мұғалім жұмыстан шығарылады.
Ең алдымен мектепті жыл сайын сырлап, әктеп, бұзылғанын жөндеп тұруға жеткілікті ақша уақытымен бөлініп тұрсын, оны ебін тауып жол-жөнекей жымқыратындарға тосқауыл қойылсын. Сонда мұғалім ақша жинамайды.
Мұғалімнің жұмыс істеуіне қажетті кітап, қағаз, қалам, желім, бояу, бор, диск, флешка, көрнекі құралдар т.б. толып жатқан қажеттіліктері тегін берілсін немесе оқу жылының басында әр мұғалімге қосымша ақша бөлінсін, сонда мұғалім ақша жинамайды.

Мектепке діни атрибутты киімдермен келуге рұқсат жоқ – вице-министр

Еліміздің мектептерінде оқушыға діни атрибутты киімдер киюге рұқсат берілмейді. Бұл туралы Орталық коммуникациялар қызметіндегі баспасөз конференциясында ҚР Білім және ғылым вице-министрі Эльмира Суханбердиева мәлімдеді, деп хабарлайды Вaq.kz тілшісі.

Биылғы жылы 4 761 мектепке міндетті мектеп формасы енгізілген болатын. Яғни, мектеп оқушыларының 76%-ы белгіленген мектеп формасын киіп жүр. Бүгінгі таңда мектеп жасындағылардың білім ордасына діни атрибутты киімдермен келуі алаңдаушылық туғызуда.

    «Еліміздің мектептерінде оқушыға діни атрибутты киімдер киюге рұқсат берілмейді. Алайда сол үшін оқушыға зекіп ұрсуға, сабаққа қатыстырмауға немесе мектептен шығарып жіберуге ұстаздардың құқы жоқ. Баланың ата-анасы шақырылып, ескерту жасалады», -деді Эльмира Суханбердиева.

ҚР Дін істері және азаматтық қоғам министрлігі Дін істері комитетінің төрағасы Ғалым Шойкиннің мәліметінше, елімізде діни атрибутты киімдермен келетін оқушылар саны 300-ге жеткен.

Айта кетейік, жыл басында ҚР Білім және ғылым министрлігі бірыңғай мектеп формасына қатысты ережені бекіткен болатын. Мектеп формасы пиджак, жилет, белдемше, шалбар, мерекелік жейдеден тұрады. Қыстың күндері трикотаж жилет, сарафан, водалазка киеді. Ұлдарға да, қыздарға да шалбар киюге рұқсат. Бұл барлық конфессия мен этностардан талап етіледі.

baq.kz