Оқулықтарға қатысты фейк суреттер жариялағандарға қылмыстық іс қозғалды

АСТАНА. ҚазАқпарат - Әлеуметтік желіде оқулықтарға қатысты фейк суреттер жариялағандарға қылмыстық іс қозғалды. Бұл туралы бүгін Үкімет отырысынан кейін БАҚ өкілдерінің сауалына жауап берген ҚР Білім және ғылым министрі Ерлан Сағадиев мәлім етті, деп хабарлайды ҚазАқпарат.

«Біз Ішкі істер министрлігіне арыз бердік, олар өз жұмыстарын бастады. Менің түсінуімше, қылмыстық іс қозғалды. Олар әзірше бізге еш ақпарат берген жоқ. Оларда жұмыс қай деңгейде өтіп жатқанын білмейміз. Біздің заңгерлік жұмыстармен айналысатын департаментіміз қазақстандық оқулықтардағы деп суреттерді жариялау фактісі бойынша қылмыстық іс қозғау туралы арыз берді. Негізінде ол суреттер қазақстандық оқулықтарда жоқ. Біз мұндай арыз беруге міндетті болдық. Егер де халықты мақсатты түрде алдау жүріп жатса, онда онымен Ішкі істер министрлігі айналысуы тиіс», - деді Ерлан Сағадиев.

Сонымен қатар министр «Оқулық» республикалық ғылыми-тәжірибелік орталық өкілдері Қазақстанның барлық өңірін аралап, аталған оқулықтардың мазмұнына қатысты наразылық танытқан ата-аналармен және ұстаздармен кездесулер өткізеді. Кездесу нәтижесінде ұсыныстар мен ескертулер жиналып, Білім және ғылым министрлігі Парламентте заңнамалық деңгейде отырыс өткізеді.

«Заңнамалық деңгейде үлкен кездесу өткізіп, барлық мәселелерді талқылаймыз. Сол жерде баспаға дайындалып жатқан оқулықтар да көрсетіледі. Содан кейін барып ортақ шешімге келеміз», - деді ол.

inform.kz

Ата-аналарға құлаққағыс: Жаңартылған білім бағдарламасындағы маңызды 6 факті

АСТАНА. ҚазАқпарат - 2016 жылғы 1 қыркүйектен Қазақстандағы барлық мектепте білім беру процесі жаңартыла бастады. ҚР Білім және ғылым министрлігінен мәлім еткендей, жаңа бағдарламаның мақсаты - мектеп оқушыларын алған білімін өмірде пайдаланатындай етіп оқыту, деп хабарлайды ҚазАқпарат.

Көптеген дамыған елдерде білім саласындағы мұндай өзгерістер өткен ғасырдың сексенінші жылдары енгізіле бастаған. Тоқсаныншы жылдардың орта шешінде бұл жаңартулар аяқталды. Қазақстанда жаңартылған бағдарламаға көшу енді басталды. 2016-2017  оқу жылында барша бірінші сынып оқушылары осы бағдарламаға көшті. Биыл 1 қыркүйектен бастап екінші, бесінші және жетінші сынып оқушылары жаңа бағдарламамен оқи бастады. Мұнымен қатар, 2017-2018 оқу жылында 30 мектепте сынақ ретінде үшінші сынып оқушылары жаңартылған бағдарламаны бастады. Білім беру саласының кезең-кезеңмен жаңаруы 4 жылға созылады. 2018-2019 оқу жылында 3, 6, 8 және 10-сыныптарға кезек келеді. 2019-2020 жылы 4, 9, 11-сыныптар көшеді.

Сағадиев электронды күнделіктерді жаппай пайдалану мәселесін көтерді

АСТАНА. ҚазАқпарат - Бүгінде мектептерді кең жолақты интернетке қосу саласында бірыңғай теxникалық саясат жоқ. Соның салдарынан білім және ғылым министрлігі электронды күнделік сияқты жобаларды толыққанды іске асыра алмай отыр, деп xабарлайды ҚазАқпарат тілшісі.

"Бүгінде электронды күнделіктерді толыққанды пайдалану үшін кең жолақты интернет аса қажет. "Соның арқасында біз қағазбасты жұмыстан арыламыз. Жалпы, осы саладағы шаралар білім беру саласын цифрландыруға жол ашады. Сол кезде әрбір баланың жеке кабинеті болады. Онда балабақшадан бастап PhD-ға дейінгі барлық ақпарат, барлық бағалар сақталады. Олимпиадалар, портфолио, дипломдар - бәрі-бәрі электронды үлгіде сақталады. Бұның барлығын іске асыру үшін мектептерде кең жолақты интернет болуы қажет", - деді ҚР Білім және ғылым министрі Ерлан Сағадиев Үкіметтің бүгінгі отырысында.

«Сауат ашуды» «Әліппеге» өзгертеміз, мүмкін латынмен бастаймыз – Сағадиев

2015 жылы «Сауат ашу» пәніне өзгерген «Әліппе» 2019 жылы қайта қалпына келтіріледі. Оның латынмен немесе кириллицамен шығатыны келесі жылдың басында нақты шешіледі. Бұл туралы ҚР Білім және ғылым министрі Ерлан Сағадиев «Хабар» телеарнасына берген сұхбатында айтты, деп хабарлайды Baq.kz ақпарат агенттігі.

Министр телеарнаға берген сұхбатында биылғы оқу жылында үлкен өзгерістердің болмағанын айтып, тек 2, 5, 7-сыныптардың оқулықтары жаңартылған мазмұнмен сабақ бастағанын жеткізді.

«2019 жылдан бастап барлық мектепке 0-сыныпты енгіземіз. Оқулықтардың жаңартылған мазмұнына кезең-кезеңмен көшудеміз. Былтырғы жылы жаңа бағдарламаны 1-сынып бастаса, биыл 2, 5, 7-сыныптар қосылды. Жаңа оқулықтар басылып, бәріне жіберілді. Келесі жылы бұл бағдарламаға 3, 6, 9-сыныптар көшеді. Биыл 73 мың мұғалім жаңартылған мазмұн бойынша деңгейін көтеру курсынан өтті. Келесі жылы тағы 70 мың мұғалім бұл курстан өтеді. Мұғалімдерге қиынға соғып жатқан жоқ. Біз мектептерді жаңартылған мазмұнға 2020 жылы толықтай көшіреміз», - деген министр биыл 1500-ден астам мұғалім ағылшын тілін үйреніп, ағылшын тілінде сабақ беруге кіріскенін айтты.

Педагог мамандарды ақылы негізде дайындау дұрыс па

АСТАНА. ҚазАқпарат - Педагог мамандарды ақылы негізде дайындау дұрыс па? Бұл сауалдың жауабын бүгін ҚР Парламенті Сенатында өтіп жатқан «Орта білім беру жүйесінің жай-күйі, проблемалары және заңнамалық реттеу перспективалар» тақырыбына арналған парламенттік тыңдау барысында ҚР білім және ғылым министрі Ерлан Сағадиев берді, деп хабарлайды ҚазАқпарат.

«Қазіргі уақытта педагог мамандарды дайындайтын көптеген жоғары оқу орындарында ақылы негізде оқитын студенттер өте көп. Сіздің көзқарасыңыз, педагог мамандарды ақылы негізде дайындау дұрыс па?», - деп сұраған еді парламенттік тыңдау барысында сенатор Мұрат Бақтиярұлы.

Ерлан Сағадиевтың айтуынша, биыл педагог мамандығына 8 мың грант бөлінді. Ол тек қана мемлекеттік универсиеттерге ғана емес сонымен бірге жеке меншік оқу орындарына да берілді.

«Грант баланың қолына беріліп, ол қалаған университетіне бара алады. Менің ойымша, мұғалімдерді тек қана мемлекеттік университеттерде ғана емес жеке меншік университеттерде де дайындау қажет болып тұр. Биыл С.Демирел атындағы университет, Қазақстан менеджмент, экономика және болжау институты сынды бірнеше оқу орны педагог мамандарын дайындауға мүмкіндік алды. Әсіресе ағылшын тілінде білім беретін университеттер мұғалімдерді дайындауға лицензияларын алып, сол жұмысқа кірісті. Менің ойымша өте қуанышты процесс. Мемлекеттік университетке бәсекелестік пайда болды», - деді министр.

inform.kz