ҰБТ өткен 8 күн ішінде апелляциялық комиссияның қарауына барлығы 547 өтініш түсті

АСТАНА. ҚазАқпарат - Тестілеудің барлық 8 күні бойынша (3-10 маусым аралығы) Республикалық апелляциялық комиссияның қарауына барлығы 547 өтініш келіп түсті. Оның ішінде 141 тест тапсырмасы қанағаттандырылды, деп хабарлады ҚР БҒМ баспасөз қызметі.

Негізінде бұл апелляциялар қазақ тілі, математика, биология және Қазақстан тарихы пәндерінен болды.

Келіп түскен өтініштерді қанағаттандырудың негізгі себебі:

-        әртүрлі авторлардың оқулықтарындағы айырмашылық;

-        техникалық себептер, оның ішінде баспалық қателер.

Тестілеу аяқталғаннан кейін барлық ҰБТ қатысушыларына пәндер бойынша жинаған балдары көрсетілген сертификаттар берілді. Осы сертификаттың негізінде олар нормативтік құжаттарда белгіленген қажетті ең төменгі балды жинаған жағдайда жоғары оқу орындарына ақылы негізде оқуға түсуге және білім гранттарын тағайындау конкурсына қатысуға құқылы.

inform.kz

Б.Асылова ҚР Білім және ғылым вице-министрі болып тағайындалды

АСТАНА. ҚазАқпарат - Бибігүл Асылова ҚР Білім және ғылым вице-министрі қызметіне тағайындалды.

2016 жылдың 10 маусымында Қазақстан Республикасы Үкіметінің қаулысымен Бибігүл Амангелдіқызы Асылова ҚР Білім және ғылым вице-министрі қызметіне тағайындалды.

Бибігүл Асылова 1975 жылғы 20 қыркүйекте Көкшетау облысында дүниеге келген.

1996 жылы Қазақ мемлекеттік басқару академиясын (Нархоз университеті) тәмамдаған.

Еңбек жолын Көкшетау облыстық қаржы басқармасынан бастады. Көп жылдар бойы қаржы министрлігі жүйесінде еңбек етіп,  экономика және бюджеттік жоспарлау министрлігінің,  мәдениет, ақпарат және спорт министрлігінің, еңбек және әлеуметтік қорғау министрлігінің, статистика агенттігінің бөлімдерін, басқармаларын, департаменттерін  басқарды.

2014 жылдан бастап білім және ғылым вице-министрі қызметіне тағайындалғанға дейін қаржы министрлігінің әлеуметтік сала бюджеті департаментінің директоры қызметін атқарды.

«Ерен еңбегі үшін» мемлекеттік медалімен марапатталған.

Көптеген құрмет грамоталары, мерейтойлық медалдары және алғыс хаттары бар.

inform.kz