Қазақстанда мектеп бағдарламасы жеңілдейді

АСТАНА. ҚазАқпарат - ҚР Білім және ғылым министрлігі мектептерде типтік оқу жоспарларын жеңілдету бағытында жұмыстарға кірісті, деп хабарлайды ҚазАқпарат тілшісі.

«Сарапшылардың көпшілігі біздің балалардың мектептегі жүктемесіне ауыр екенін растап отыр. Бұл мәселеге Мемлекет басшысы назар аударған еді. ТМД және ЭЫДҰ елдерімен салыстырсақ, біздің типтік оқу жоспарларымыздың артық жүктемесі бар. Қазіргі кезде министрлік тиісті жұмысты іске асырып жатыр, осы орайда жұмыс тобы құрылды. Бұл бағытта сарапшылармен, әдіскерлермен және педагогтық қоғамдастықпен консультациялар жүріп жатыр», - деді Білім және ғылым вице-министрі Асхат Аймағамбетов Орталық коммуникациялар қызметінде өткен баспасөз мәслихатында.

Бұл тұрғыда ол мектеп бағдарламаларын жеңілдету ауқымды талдау жұмыстарын қажет етіп отырғанын сөз етті.

«Оқу бағдарламасын жай ғана қысқарта салу қисынсыз әрекет. Бұл ретте білім саласы алдында тұрған мақсаттарды ескеру керек, сонымен қатар қоғам үшін қажет мектеп түлегіне қойылатын талаптар пысықталуы тиіс. Сондықтан осы өзекті мәселелерді ескере отырып, шешім қабылдау қажет. Сәйкесінше, бұл бағытта білікті сарапшылар өз бағасын беруі орынды болар еді», - деп түйді ол.

Бұдан бұрын хабарланғандай, биыл ақпан айында Мәжілісте орта білім мәселелеріне арналған отырыста Бекболат Тілеухан баласы теңертеңнен кешке дейін мектепте екенін айтып, наразылығын білдірген еді.

kazinform.kz

Білім министрі тест тапсыра алмаған мұғалімдер жазаланбайтынына уәде етті

АСТАНА. ҚазАқпарат - ҚР Білім және ғылым министрі Ерлан Сағадиев ұлттық біліктілік тестілеуін тапсыра алмаған мұғалімдерге ешқандай жазалау шаралары қолданылмайтынына уәде етті, деп хабарлайды ҚазАқпарат тілшісі.

«Мамыр айында мұғалімдер ұлттық біліктілік тестілеуін тапсыруды бастайды. Егер де көпшілігі өздерінің біліктілігін дәлелдей алмаса, онда біз ешқандай жазалау шараларын қабылдамаймыз. Ережеге сәйкес, олар тест тапсырмаса, онда бұрынғы дәрежесімен және еңбекақысымен жұмысын жалғастырады. Мұғалімдерге қатысты ешқандай құқықтық салдар қарастырылмайды», - деді министр.

Сонымен қатар ол әкімдіктердің әлдебір квоталар енгізіп, мұғалімдерге жазалау шаралары қолданылатындығымен қорқытып жатқандағы туралы сыбыстар министрлікке жетіп жатқандығын айтты.

«Біз осындай қадамдарға бармауды өтінеміз. Мұғалімдерде ұлттық біліктілік тестілеуіне дайындалуға қажетті уақыты болуы керек. Сонымен қатар педагогтар оны қашан тапсырса да өздері біледі. Сәйкесінше, ешқандай да мәжбүрлеу болмауы керек», - деді БҒМ басшысы.

Оның сөзіне қарағанда, аталған тестілеуді тапсыруға өз еркімен 60 мың мұғалім жазылған. «Бұл өз кезегінде мұғалімдер өздерінің біліктілігіне сенімді екенін, өз пәнін жақсы білетінін білдіреді. Ол 26 мамырда басталып, бірнеше күнге созылады», - деді ол.

kazinform.kz

Қазақстанда мектептерді қаржыландыру тәртібі өзгереді

АЛМАТЫ. ҚазАқпарат - 2020 жылдан бастап Қазақстанның барлық мектептерінде жан басына шаққандағы қаржыландыру жүйесі енгізіледі. Бұл туралы Алматыда өткен арнайы жиын барысында айтылды, деп хабарлайды ҚазАқпарат тілшісі.

Бүгінде Алматы мен Астана қалаларында 5 мемлекеттік мектеп осындай қаржыландыру түріне көшкен.

Аталған мектептерге қаржы бала санына қарай беріледі. 2020 жылдан бастап еліміздегі барлық мектепке қаржы бала санына қарай берілетін болады.
Сонымен қатар, қаржы жекеменшік мектептерге де қарастырылады.

ҰБТ-ға уақытында қатыса алмағандарға қандай мүмкіндіктер қарастырылған

АСТАНА. ҚазАқпарат - Қандай да бір ауыр жағдайға тап болып, Ұлттық бірыңғай тестілеуді уақытылы тапсыра алмаған түлектерге не істеуге болатынын Астанадағы Орталық коммуникациялар орталығында өткен баспасөз мәслихатында ҚР Білім және ғылым вице-министрі Асхат Аймағамбетов айтып берді, деп хабарлайды ҚазАқпарат тілшісі.

«Ұлттық Бірыңғай тестілеуді тапсыру бойынша алдыңғы жылдары кейбір қиындықтар болғанын білесіздер. Мысалы, балаларда әртүрлі қиын жағдайлар болып қалуы мүмкін. Ауырып қалуына немесе жақындарының қайтыс болуына байланысты немесе тағы да басқа келеңсіз жағдайға, жол апатына байланысты тестілеуге қатыса алмай қалған жағдайлар болды. Осындай жағдайға тап болған түлектер амалсыздан ҰБТ-дан қалып қойып жатты», - деді ол.

Биыл мұндай жағдайларға ұшыраған азаматтарға Білім және ғылым министрлігі жаңа мүмкіндік беріп отыр.
«Егер сол елдімекенде ҰБТ өткізіліп жатса, онда олар тиісті құжатты тапсырып, басқа күні ҰБТ-ны тапсыруына болады. Егер сол уақытта ҰБТ бітіп қалса, онда олар кешенді тестілеу кезінде тапсыра алады. Демек, бұның бәрі мектеп түлектеріне қосымша жағдай жасау үшін істелуде», - деді Асхат Аймағамбетов.

Айта кетсек, биыл 146 мың мектеп бітірушінің 96 963 мыңы ҰБТ тапсыруға өтініш білдіріп отыр. Олардың 80 пайызы, яғни 73 мыңы тестті қазақ тілінде тапсыруға бел байлаған.

kazinform.kz

Айлықты 50 пайызға өсіруге мүмкіндік беретін тестті қанша мұғалім тапсырады

АСТАНА. ҚазАқпарат - Айлықты қосымша 50 пайызға өсіруге мүмкіндік беретін Ұлттық біліктілік тестіне 60 мыңнан астам мұғалім жазылды. Бұл туралы елордадағы Бейбітшілік және келісім сарайында өтіп жатқан Қазақстан халқы Ассамблеясының XXVІ сессиясында ҚР Білім және ғылым министрі Ерлан Сағадиев мәлім етті, деп хабарлайды ҚазАқпарат тілшісі.

«Мұғалімдердің айлықтарының өсуі 300 мыңға жуық жаңартылған білім мазмұнында оқитын ұстазды қамтиды. Олардың 18 мыңы - тәжік, өзбек, ұйғыр тілдерінде сабақ береді. Мамыр айында айлықты қосымша 50 пайызға өсіруге мүмкіндік беретін Ұлттық біліктілік тестіне 60 мыңнан астам мұғалім жазылды. Біз мұны күткен жоқпыз. Бұл дегеніңіз біздің мұғалімдердің жасқанбайтынын, өз пәнін білетінін, өз-өзіне толығымен сенімді екенін көрсетеді», - деді Ерлан Сағадиев.
Министрдің айтуынша, Бес әлеуметтік бастама аясындағы тың жобалар білім саласының дамуына тың серпін берері анық.
«Қазіргі таңда жаңа гранттарды бөлуге, студенттерді жатақханамен қамтуға байланысты министрлік нақты жоспарды әзірледі. Үкімет қаулысы қабылданды. Қосымша 20 мың грант мамандықтар бойынша бөлінді. Әсіресе, техникалық мамандықтарға маңыз беріліп отыр. Біз жұмысқа тұру жағын да, технологиялық дамуымен бірге экономиканың құрылымды түрдегі өзгерісіне қарай инженерлер, химиктер мен ІТ саласындағы мамандарды жұмыспен қамту жағын ескердік», - деді Ерлан Сағадиев.

kazinform.kz