Біз әлемді өзгерте аламыз!

Адам баласы осынау жарық дүниеге шыр етіп келіп, көзін ашқаннан соң - ақ «өмір» атты алып әлемнің титтей бір бөлшегі болып саналады. Алғаш тәй - тәй басқан бүлдіршін уақыт өте келе мектеп табалдырығын аттайды, ұстаздары мен аяулы мектебінен ізгілік пен жақсылықтың алғашқы әліпбиін үйренеді. Есейе келе үлкен өмірге араласып, оңы мен солын айыруға талаптанады. Осы уақыттар ішінде көкірек көзі бар адамның «Мен кіммін?» деген сауал қоятыны анық. Бізді қоршаған әлем біздің өзімізден, өмірге деген көзқарасымыздан басталады деп ойлаймын. Әлем дегеніміз не? Әлемді өзгерту дегенді қалай түсінуге болады? Мен әлемді өзгерте аламын ба? Менің өз ойымша, әр адамның өзінің ішкі әлемі болады. Ішкі әлем дегеніміз - ішкі жан дүниең, ішкі пайымдауың, ішкі өзіндік көзқарасың. Ақ пен қараның, күн мен түннің қарама - қарсылығы сияқты адамның ішкі дүниесінде де нәпсі мен қанағат, адалдық пен арамдық, жақсылық пен жамандықтың күресі, тайталасы жүріп тұратын сияқты.