Педагог күнделікті жағдайлар арқылы оқушылардың әділдік пен құрмет түсінігін қалай қалыптастырады?

Педагог ретінде күнделікті оқу үдерісінде оқушылардың бойында әділдік пен құрмет сияқты маңызды құндылықтарды қалыптастыру – мен үшін басты міндеттердің бірі деп есептеймін. Әсіресе технология пәні мұғалімі ретінде мен бұл қасиеттерді тек сөз арқылы емес, нақты іс-әрекет арқылы үйретуге тырысамын. Себебі технология сабағы – оқушылардың бірге жұмыс жасап, бір-бірімен тығыз қарым-қатынас орнататын ортасы. Менің тәжірибемде әділдік пен құрмет ең алдымен сабақтағы қарапайым ережелерден басталады. Мысалы, құрал-жабдықтарды пайдалану кезінде әр оқушыға тең мүмкіндік беру, кезек сақтау, бір-бірінің еңбегіне зиян келтірмеу – осының барлығы әділдікке тәрбиелейді. Егер бір оқушы ережені бұзса, мен оны бірден жазаламай, алдымен неге бұлай жасауға болмайтынын түсіндіруге тырысамын. Осы арқылы оқушы өз әрекетінің салдарын түсінеді.