Қазақ тілін оқытудағы психологиялық және мотивациялық аспектілер

Қазіргі таңда қазақ тілін тиімді оқыту – білім беру саласындағы өзекті мəселелердің бірі. Тіл үйренушілердің жетістігіне әсер ететін психологиялық факторлар мен мотивация ерекше назар аударуды талап етеді. Зерттеулер көрсеткендей, он жылдан астам уақыт бойы (балабақшадан бастап университетке дейін) мемлекеттік тілді оқытқанның өзінде, көптеген түлектер оқу бітірген кезде қазақ тілінде еркін сөйлей алмай жатады. Оқу құралдарының, мультимедиа ресурстарының көптігіне қарамастан мұндай қанағаттанарлықсыз нəтиже тіркелуі мамандарды алаңдатып отыр. Бұл проблема қазақ тілін оқытудың мазмұны мен әдістемесінде, соның ішінде оқушының психологиясы мен ынтасына көңіл бөлінбеуінде болуы мүмкін.