Ашық сабақ Қазақстанның пайдалы қазбалары

Қазақстанның пайдалы қазбалары Қазақстан – пайдалы қазбаларға өте бай мемлекет. Ел аумағында металдық, бейметалдық және жанғыш пайдалы қазбалардың барлық дерлік түрі кездеседі. Металдық пайдалы қазбаларға темір, мыс, қорғасын, мырыш, алтын, күміс жатады. Темір кені негізінен Қостанай облысында, мыс – Жезқазған мен Балқаш өңірінде, ал алтын Ақмола мен Шығыс Қазақстанда өндіріледі. Жанғыш пайдалы қазбаларға мұнай, газ, көмір кіреді. Мұнай мен газдың ірі кен орындары Атырау, Маңғыстау, Батыс Қазақстан облыстарында орналасқан. Көмірдің басты кендері – Қарағанды және Екібастұз. Бейметалдық пайдалы қазбаларға ас тұзы, фосфорит, әктас жатады. Фосфориттің ірі қоры Қаратау өңірінде шоғырланған. Пайдалы қазбалар Қазақстан экономикасының дамуына үлкен үлес қосады, өнеркәсіп пен энергетиканың негізгі шикізат көзі болып табылады.