«Өлкетану зертханасы: туған жерді танып-білу»

«Өлкетану зертханасы: туған жерді танып-білу» вариативтік курсы 10-11 сынып оқушыларына арналған білім алушылардың туған өлкесінің тарихын, табиғатын, мәдениетін, әдебиетін, тарихи тұлғаларын және әлеуметтік-экономикалық ерекшеліктерін зерттеуіне бағытталған. Өлкетану — оқушының өз туған жерін жай ғана танып білуімен шектелмей, оны бақылау, ақпарат жинау, салыстыру, сұхбат алу, тарихи деректерді талдау, картамен жұмыс жасау, зерттеу жүргізу және нәтижені таныстыру арқылы меңгеруіне мүмкіндік беретін маңызды бағыт. Курстың мазмұны оқушылардың жас ерекшелігіне сай зерттеушілік және шығармашылық тапсырмаларға негізделеді. Оқушылар туған жерінің тарихына қатысты ауызша тарих үлгілерін, мұрағаттық және әдеби деректерді, картографиялық материалдарды, фотосуреттерді, музей жәдігерлерін, табиғи нысандарды зерттейді.