ОРГАНИКАЛЫҚ ХИМИЯҒА КІРІСПЕ: КӨМІРСУТЕКТЕР ЖӘНЕ ОЛАРДЫҢ ТУЫНДЫЛАРЫ

Бағдарламаның өзектілігі қазіргі таңдағы химия өнеркәсібінің, мұнай-химия саласының және биотехнологияның даму қарқынымен тікелей байланысты. Қазақстан Республикасының индустриялық-инновациялық даму стратегиясы аясында отандық шикізатты терең өңдеу мәселесі алдыңғы қатарға шықты. Сондықтан мектеп пен жоғары оқу орны арасындағы сабақтастықты сақтай отырып, оқушыларға көмірсутектердің химиялық табиғатын, олардың функционалды туындыларының (спирттер, альдегидтер, карбон қышқылдары) қасиеттерін жүйелі меңгерту – уақыт талабы. Бұл бағдарлама білім алушылардың химиялық құбылыстарды тек теория жүзінде емес, экологиялық және экономикалық тұрғыдан бағалай білу дағдыларын қалыптастырады [1, 12-б.]. Химиялық білім берудің мазмұнын жаңарту жағдайында органикалық қосылыстардың номенклатурасын, изомериясын және реакциялық қабілеттілігін заманауи теориялық концепциялар тұрғысынан түсіндіру қажеттілігі туындап отыр [2, 45-б.].