ҚАЗАҚ ТОПОНИМДЕРІНЕ ТІЛДІК ТРАНСЛИТЕРАЦИЯНЫҢ ӘСЕРІ

Қазақ топонимдерін басқа тілдерде беру мәселесі қазіргі жаһандану жағдайында ерекше маңызға ие. Географиялық атаулардың халықаралық карталарда, ақпараттық жүйелерде, туристік ресурстарда, ғылыми еңбектерде және цифрлық платформаларда қолданылуы олардың түпнұсқадан басқа графикалық жүйелерге ауысуын талап етеді. Әсіресе қазақ тілінің кирилл графикасынан латын графикасына көшу үдерісі топонимдердің жазылуы мен халықаралық деңгейде берілуіне жаңа талаптар қалыптастырды [1]. Бұл мақаланың мақсаты – жаһандану жағдайында қазақ және ағылшын топонимиясының этнолингвистикалық және мәдени трансформация ерекшеліктерін салыстырмалы тұрғыдан анықтау. Зерттеу барысында географиялық атаулардың қалыптасуына әсер ететін табиғи, тарихи, этникалық және әлеуметтік-мәдени факторларды саралау, қазақ топонимдерінің халықаралық кеңістікте транслитерациялану ерекшеліктерін анықтау және олардың ұлттық-мәдени мазмұнының сақталу деңгейін бағалау көзделеді [2].