«Қазақстан-құтты мекен» авторлық бағдарламасының тиімділігі

Қазіргі жаһандану жағдайында өскелең ұрпақтың ұлттық болмысын сақтап, туған жеріне деген сүйіспеншілігін арттыру – білім беру жүйесінің маңызды міндеттерінің бірі. Оқушылардың ел тарихын, мәдениетін, салт-дәстүрін терең танып-білуі олардың тұлға болып қалыптасуына тікелей әсер етеді. Осы тұрғыда білім беру мен тәрбиені ұштастыратын, ұлттық мазмұнға негізделген бағдарламалардың рөлі ерекше болады. Қазақстан Республикасында жүзеге асырылып жатқан «Біртұтас тәрбие» идеясы мен «Туған жер» бағыты білім беру мазмұнына өлкетану, ұлттық тәрбие элементтерін енгізудің маңыздылығын айқындап отыр. Осы талаптарға сай әзірленген «Қазақстан-құтты мекен» авторлық бағдарламасы оқушылардың туған өлкеге деген қызығушылығын арттырып, отансүйгіштік қасиеттерін қалыптастыруға бағытталған.