Табиғатты қорғау идеяларын бастауыш сыныптан қалыптастыру жолдары

Қазіргі қоғам дамуының басты ерекшеліктерінің бірі – адам мен табиғат арасындағы қарым-қатынастың күрделене түсуі. Ғылыми-техникалық прогресс пен өндірістің қарқынды дамуы экологиялық тепе-теңдіктің бұзылуына, қоршаған ортаның ластануына әкеліп соқтыруда. Осыған байланысты табиғатты қорғау, экологиялық қауіпсіздікті сақтау мәселесі білім беру жүйесінің маңызды бағыттарының біріне айналып отыр. Экологиялық тәрбиені тиімді жүзеге асырудың негізгі алғышарты – оны баланың жас ерекшеліктеріне сай, жүйелі түрде ұйымдастыру. Әсіресе бастауыш сынып кезеңі баланың тұлғалық қасиеттері, дүниетанымы мен құндылық бағдарлары қалыптасатын маңызды саты болғандықтан, табиғатты қорғау идеяларын осы кезеңнен бастап қалыптастыру өзекті педагогикалық міндет болып табылады. Бастауыш сынып оқушысы табиғатты эмоционалдық тұрғыда қабылдайды, сондықтан экологиялық тәрбиені сезімге әсер ету, бақылау, тәжірибе жасау арқылы жүзеге асыру тиімді нәтиже береді.